Hatursorðræða gagnvart hinsegin fólki er til umfjöllunar í nýjasta þætti Meiningar á Rás 1 og verður umfjölluninni fram haldið í næsta þætti. Þar er leitast við að greina hvað býr að baki slíkri orðræðu og hvaða áhrif hún getur haft. Jafnframt er gerður skýr greinarmunur á athugasemdum sem fela í sér ótta, efasemdir eða vangaveltur og þeim sem einkennast af andúð, niðurlægingu eða hvatningu til mismununar og ofbeldis.
Anna Gyða Sigurgísladóttir dagskrárgerðarmaður fór yfir athugasemdir undir fréttum um hinsegin málefni og fann fjölmörg dæmi um gróft orðalag. Þar var meðal annars talað um „geðsjúkt translið“ og kallað eftir því að „stoppa þetta brjálæði“. Þá voru hinseginleiki og regnbogafáninn tengd við barnagirnd og barnaníð.
Anna Gyða reyndi jafnframt að ræða við nokkra þeirra sem hafa látið slík ummæli falla en helstu talsmenn landsins gegn trans fólki hafa ítrekað óskað eftir því að „opna umræðuna um trans málefni“ eins og þeir orða það. Um var að ræða fullorðið fólk sem hafði í flestum tilfellum skrifað athugasemdirnar undir fullu nafni, meðal annars á eigin samfélagsmiðlum. Enginn þeirra sem hún hafði samband við var tilbúinn að ræða ummæli sín á upptöku.
Kári Garðarsson, framkvæmdastjóri Samtakanna 78, segir samtökin hafa kært fjögur mál vegna hatursorðræðu á síðustu fimm árum. Hann segir fjölda mála þó ekki endurspegla umfang vandans, enda skorti samtökin bæði fjármagn og mannskap til að fylgja öllum málum eftir.
Athugasemdir