Bandaríska útlendingaeftirlitið, ICE, hefur handtekið 25 ára gamlan mann frá Venesúela sem komst í fréttir eftir að hann sást koma upp úr holræsi skammt frá höfuðstöðvum Sameinuðu þjóðanna í New York.
Maðurinn, Samuel Reveron Ascanio, hafði áður verið handtekinn af lögreglu í New York og ákærður fyrir ólöglega för inn á lokað svæði. Að sögn New York Post hafði alríkisyfirvöldum þegar verið heimilað að handtaka hann en honum var sleppt úr haldi borgaryfirvalda áður en ICE tók hann höndum.
Málið hófst þegar tilkynnt var um þrjá menn sem sáust koma upp úr brunni við Park Avenue og East 61st Street aðfaranótt 23. september. Mennirnir yfirgáfu svæðið í tveimur bifreiðum.
Atvikið vakti upphaflega öryggisáhyggjur þar sem Benjamin Netanyahu, forsætisráðherra Ísraels, var væntanlegur á allsherjarþing Sameinuðu þjóðanna og átti að dvelja á hóteli skammt frá. Rannsókn lögreglu leiddi hins vegar í ljós að mennirnir væru að leita að verðmætum, brotajárni og öðrum munum sem skolast hefðu niður í frárennsliskerfið.
Reveron Ascanio og Kevin Rodriguez, 26 ára, voru ákærðir vegna málsins en lögregla leitaði enn þriðja mannsins.
Reveron Ascanio hafði einnig verið handtekinn nokkrum dögum fyrr vegna gruns um skemmdarverk. Hann og tveir aðrir menn voru þá sakaðir um að fjarlægja hluti úr leigubifreið í Queens án heimildar.
ICE hefur gagnrýnt borgaryfirvöld í New York fyrir að hafa sleppt manninum og segir málið sýna afleiðingar takmarkaðrar samvinnu borgarinnar við alríkisyfirvöld í innflytjendamálum.
Athugasemdir