Læknir fannst látinn á heimili þar sem börn gistu

Heim­il­is­læknir fannst látin á heim­ili sínu þar sem hún hélt nátt­fatap­artý fyrir börn, að sögn íbúa á svæð­inu.

Hannah Cain, sem var á fimm­tugs­gs­aldri, fannst látin í Ders­ing­ham í Norfolk snemma á sunnu­dags­morgun. Bærinn er í útjaðri Sandring­ham-jarð­ar­innar.

Karl­maður á fimm­tugssaldri hefur verið hand­tek­inn grun­aður um morð og er enn í haldi lög­reglu.

Hannah, sem gekk undir nafn­inu Dr. Hannah Terry í starfi sínu, starf­aði á heilsu­gæslu­stöð í nær­liggj­andi bæ, Grimston. Stöðinni var lokað í dag vegna þess sem stjórn­endur lýstu sem „afar erf­iðra aðstæðna sem hafa áhrif á starfs­fólk okkar“.

Hún starf­aði einnig hjá Norfolk Sky Aesthetics, fyr­ir­tæki sem sér­hæfir sig í snyrti- og fegr­un­ar­með­ferðum.

Íbúar í Ders­ing­ham, sem er í um 1,6 kíló­metra fjar­lægð frá Sandring­ham-höll, segja að Hannah hafi átt ung börn og að fleiri börn hafi gist á heim­ili hennar þegar atburð­ur­inn átti sér stað. Húsið er stórt ein­býl­is­hús við Fern Hill.

Lögregla var kölluð að hús­inu um klukkan 2.20 aðfara­nótt sunnu­dags. Börnin sem þar voru fengu síðan far með lög­reglu­mönnum til fjöl­skyldna sinna.

Lögregla girti í kjöl­farið af svæðið við húsið.

Í gær­morgun sást vel­unn­ari leggja blóm fyrir utan húsið að sögn Mirror.

Sér­sveit­ar­menn komu á sendi­bíl síð­degis í gær og lögðu í inn­keyrslu nágranna. Þeir sáust fara í bláa hanska áður en þeir gengu inn í húsið.

Íbúar í þorp­inu lýstu því sem rólegum stað í Norfolk. Ein nágranna­kona sagði að Hannah hefði búið í hús­inu við Fern Hill í tíu ár. Gatan liggur út úr þorp­inu, með trjám með­fram veg­inum, og áfram út í opið sveita­land.

„Hún var ynd­is­leg mann­eskja og átti þrjú dásam­leg ung börn. Það er aug­ljóst að eitt­hvað hefur farið mjög illa úrskeiðis. Ég er ein­fald­lega orð­laus, við erum það öll,“ sagði konan.

Karl­maður á tíræð­is­aldri, sem býr í næsta húsi, sagði að hann hefði ekk­ert vitað fyrr en lög­reglan kom.

„Ég sá þau mjög sjaldan, en börnin voru ynd­is­leg. Þau spörk­uðu stundum fót­bolt­anum sínum inn í garð­inn minn og ég spark­aði honum aftur til þeirra. Stundum komu þau líka og spurðu hvort þau mættu koma inn og leita að bolt­anum.“

„Maður les um svona hluti ann­ars staðar,“ sagði annar nágranni. „En maður býst aldrei við að eitt­hvað þessu líkt ger­ist svona nálægt manni.“

Annar maður, sem hefur búið í nágrenn­inu í 50 ár, sagði þorpið ein­kenn­ast af vina­legu sam­fé­lagi.

„Ders­ing­ham er kannski ekki með eig­in­legan miðbæ, en það hefur hjarta,“ bætti hann við.

Annar íbúi sagði að þetta væri staður þar sem fólk gæti gleymt að læsa bílnum sínum yfir nótt án þess að nokkuð gerð­ist.

Rannsókn lög­reglu stendur enn yfir. Lögregla hefur fengið heim­ild til að halda hinum grun­aða í yfir­heyrslu í 32 klukku­stundir til við­bótar.

Í til­kynn­ingu frá lög­regl­unni í Norfolk segir:

„Rann­sókn­ar­lög­reglu­mönnum hefur verið veittur við­bót­ar­tími til að yfir­heyra karl­mann sem var hand­tek­inn í tengslum við and­lát konu í Ders­ing­ham.“