Sólveig Anna Jónsdóttir, formaður Eflingar, fer hörðum orðum um Samtök atvinnulífsins og Bjarna Benediktsson, framkvæmdastjóra samtakanna, í langri færslu á Facebook. Þar lýsir hún því yfir að traust milli Eflingar og Samtaka atvinnulífsins sé „algjörlega horfið“ og spáir átökum þegar næst verður samið á vinnumarkaði.
Sólveig Anna er reglulega yfirlýsingaglöð þegar kemur að átökum á vinnumarkaði og orð hennar í færslunni eru stór. Hún fullyrðir meðal annars að SA hafi ákveðið að „friðþægja VR og fylgdarlið formanns félagsins“ og svikið trúnað við breiðfylkingu Eflingar, SGS, Samiðnar og Byggiðnar.
Ekki fylgja færslunni gögn sem sýna fram á að trúnaður hafi verið rofinn með þeim hætti sem hún lýsir eða að fyrir liggi leynilegt samkomulag. Sólveig Anna segir þó „að öllum líkindum“ samkomulag geymt hjá embætti ríkissáttasemjara og setur þannig fram alvarlegar vangaveltur án þess að fullyrða að hún hafi sannanir fyrir þeim.
Hún ber jafnframt Bjarna saman við forvera hans, Sigríði Margréti Oddsdóttur, sem hún segir hafa komið heiðarlega fram við Eflingu þrátt fyrir ágreining.
Um Bjarna notar hún öllu þyngri orð og sakar hann meðal annars um framgöngu úr „klækjastjórnmálunum“ og segir hann koma úr „blekkingar og speglasal atvinnustjórnmálanna“.
Sólveig Anna telur SA hafa valið ófrið við Eflingu og boðar í raun erfiðari samskipti fram undan. Hvort sú dökka framtíðarsýn rætist kemur þó væntanlega ekki í ljós fyrr en næsta kjaralota hefst.
Athugasemdir