Þrjátíu manns létust þegar hluti urðunarstaðar í Conakry, höfuðborg Gíneu, hrundi yfir nærliggjandi heimili aðfaranótt sunnudags. Miklar rigningar höfðu gengið yfir svæðið áður en slysið varð.

Stjórnvöld í Gíneu greindu frá því að slysið hefði orðið í Dar-es-Salam-hverfinu í Gbessia, í útjaðri höfuðborgarinnar. Samkvæmt upplýsingum stjórnvalda særðust sex manns alvarlega.

Mikið magn úrgangs féll yfir íbúðarhús í grennd við urðunarstaðinn og gróf fólk undir. Björgunaraðgerðir hófust í kjölfarið og voru gröfur meðal annars notaðar við leit í rústunum. Enn var leitað að fólki á svæðinu í dag.

Lancine Sylla, leiðtogi í hverfinu, hafði fyrr um daginn lýst yfir ótta við að mannfallið yrði mikið. Hann sagði í samtali við AFP að 18 lík hefðu þegar fundist og verið flutt í líkhús.

Djenabou Toure, ráðherra sveitarstjórnarmála í Gíneu, fór á vettvang eftir slysið og fylgdist með björgunaraðgerðum.

Stjórnvöld höfðu dagana fyrir slysið fyrirskipað brottflutning fólks af svæðinu og gripið til öryggisráðstafana vegna hættu á að urðunarstaðurinn gæti hrunið. Þrátt fyrir það voru íbúar enn á svæðinu þegar slysið varð.