Rauði krossinn á Íslandi hefur í september veitt rúmlega 36 milljónir króna til mannúðarstarfs í Úkraínu. Framlagið er svar við neyðarbeiðni Alþjóðasambands Rauða krossins og Rauða hálfmánans (IFRC) vegna afleiðinga átakanna í landinu. Styrkurinn er veittur með stuðningi utanríkisráðuneytisins og fjárframlögum frá almenningi á Íslandi.
„Átökin í Úkraínu hafa nú staðið í vel á fjórða ár og hafa á þeim tíma komið hart niður á almennum borgurum,“ segir Hrafnhildur Sverrisdóttir, verkefnastjóri í alþjóðateymi Rauða krossins. „Innviðir í landinu hafa víða orðið fyrir miklum skemmdum og átökin því haft veruleg áhrif á aðgengi fólks að vatni, rafmagni, menntun og heilbrigðisþjónustu.“
Samkvæmt Rauða krossinum hefur það við þessar aðstæður reynst áskorun að koma mannúðaraðstoð til þeirra sem hafa orðið hvað verst úti. IFRC hefur allt frá því átökin hófust árið 2022, með starfsfólk og sjálfboðaliða Rauða krossins í Úkraínu í broddi fylkingar, sinnt fólki sem er í mikilli neyð.
Milljónir borgara hafa neyðst til að flýja Úkraínu, og talið er að um 3,6 milljónir séu enn á flótta innan landsins. Starf Rauða krossins felst meðal annars í því að útvega fólki mat og hreint vatn, tryggja aðgang að hreinlætisaðstöðu, grunnheilbrigðisþjónustu og húsaskjóli. Þá er einnig lögð áhersla á að vernda fólk gegn ofbeldi og mismunun.
Frá upphafi átaka hafa Alþjóðasamband Rauða krossins og úkraínski Rauði krossinn veitt meira en 17 milljónum einstaklinga mannúðaraðstoð. Á sama tíma hefur Rauði krossinn á Íslandi, með stuðningi utanríkisráðuneytisins, styrkt mannúðarstarf í Úkraínu um rúmlega 265,8 milljónir króna og sent átta sendifulltrúa til að styðja neyðarviðbrögð hreyfingarinnar.
