Grísk yfirvöld hafa úrskurðað bæjarstjóra og tvo aðra menn í gæsluvarðhald vegna gruns um að bera ábyrgð á umfangsmiklum skógareldi sem geisaði skammt frá Aþenu í síðustu viku. Mennirnir hafa verið ákærðir fyrir íkveikju og skemmdir á opinberum innviðum.
Rannsakendur telja að eldurinn hafi kviknað 31. júlí þegar neisti myndaðist í rafmagnslínum við vindorkuver nærri sjávarþorpinu Agios Vasileios, um 85 kílómetra norðvestur af Aþenu.
Giannis Apostolou, bæjarstjóri Stylida, er einn hinna ákærðu. Hann á fyrirtæki sem sérhæfir sig í raflögnum og hefur tengsl við vindorkuverið. Auk hans sæta verktaki hjá fyrirtækinu og eigandi vindorkuversins ákæru. Verði þeir fundnir sekir gætu þeir átt yfir höfði sér meira en tíu ára fangelsi.
Gríska fréttastofan ANA greindi frá því á föstudag að yfirvöld hefðu ákveðið að stöðva starfsemi vindorkuversins meðan málið væri rannsakað.
Miklar vindhviður, sem náðu allt að 130 kílómetra hraða á klukkustund, urðu til þess að eldurinn breiddist hratt út frá rafmagnslínunni í átt að suðurhlíðum Kithairon-fjalls. Eldurinn náði að bæ í um 40 kílómetra fjarlægð frá Aþenu.
Eigandi vindorkuversins er meðal annars sakaður um að hafa ekki hreinsað gróður á svæðinu. Eldur hafði áður kviknað við sömu rafmagnslínu 27. júní.
Skógur, kjarrlendi og ólífulundir urðu eldinum að bráð. Þá skemmdust meira en 120 hús og aðrar byggingar í strandbænum Porto Germeno við Korintuflóa.
Tugir gróðurelda hafa geisað í Grikklandi frá lokum júlí og hafa að minnsta kosti fimm manns látið lífið, þar á meðal þrír slökkviliðsmenn.
