Greiningardeildir Íslandsbanka og Landsbankans spá því að verðbólga aukist í ágúst og verði 5,5 til 5,6 prósent. Verðbólga mældist 5,3 prósent í júlí en Hagstofan birtir ágústmælinguna 27. ágúst.
Íslandsbanki spáir 5,6 prósenta ársverðbólgu og Landsbankinn 5,5 prósentum. Útsölulok, húsnæðiskostnaður og hækkun skráningargjalda opinberra háskóla vega til hækkunar. Aukin eftirspurn vegna sólmyrkvans gæti jafnframt haft tímabundin áhrif á verð í ferðaþjónustu.
Verðbólguviðmið stöðugleikasamninganna er 4,7 prósent í ágúst. Báðir bankarnir telja litla óvissu um að viðmiðið verði rofið. Gangi spárnar eftir opnast því heimild til endurskoðunar kjarasamninga. Náist ekki samkomulag um viðbrögð við forsendubresti getur komið til uppsagnar þeirra.
Bankarnir búast við þrálátri verðbólgu næstu mánuði. Íslandsbanki spáir 5,7 prósenta verðbólgu í september en Landsbankinn 5,6 prósentum. Horfur eru þó á að verðbólga minnka þegar líður á veturinn, samkvæmt spám bankanna tveggja.
