Bandaríska leikkonan Erika Eleniak, sem er þekktust fyrir hlutverk sitt í sjónvarpsþáttunum Baywatch, hefur opnað reikning á OnlyFans. Eleniak er 56 ára og segir aðdáendur þar fá að kynnast persónulegri hlið á henni en áður.
Eleniak lék strandvörðinn Shauni McClain í Baywatch á árunum 1989 til 1992 og varð á þeim tíma ein þekktasta stjarna þáttanna.
Í samtali við TMZ segir hún að á OnlyFans muni hún birta persónulegar ljósmyndir og myndbönd, meðal annars efni frá ströndinni og myndir sem sérstaklega eru ætlaðar þeim aðdáendum sem hafa óskað eftir myndum af berum fótum hennar.
„Ég ólst í rauninni upp á ströndinni í rauðum sundbol, þannig að þetta er eins og að loka hringnum nema núna ræð ég ferðinni,“ segir Eleniak.
Hún segir að fólk hafi í áratugi fyrst og fremst tengt hana við Baywatch en að áskrifendur að OnlyFans-reikningnum fái að sjá aðra hlið á henni.
Eleniak bætist þar með í hóp þekktra Hollywood-leikara sem hafa á undanförnum misserum gengið til liðs við OnlyFans. Þar á meðal eru Donna Mills, sem er 85 ára og þekkt fyrir hlutverk sitt í Knots Landing, og leikkonan Jaime Pressly.
