Þýska skipið Gorch Fock er komið til Reykjavíkur og liggur við Faxagarð í Gömlu höfninni. Almenningi gefst kostur á að stíga um borð og kynna sér skipið næstu daga.

Gorch Fock var smíðað árið 1958 og er skólaskip þýska sjóhersins, þar sem sjóliðsforingjar hljóta þjálfun. Skipið er jafnframt þekkt sem „hvíti sendiherrann“ og hefur lengi verið tákn þýskrar sjómennsku og er eitt þekktasta seglaskip Þýskalands

Reykjavík er síðasti viðkomustaður skipsins á 189. þjálfunarferð þess erlendis áður en haldið verður til Kiel. Skipið kom síðast til Íslands árið 2009.

Opið verður um borð frá klukkan 14 til 17 dagana 2. til 5. september. Þýska sendiráðið, áhöfn Gorch Fock og Faxaflóahafnir standa að heimsóknunum. Gestir eru beðnir um að koma án taskna vegna öryggiseftirlits.