Bandaríska raunveruleikastjarnan, Courtney Stodden, hefur gengist undir brjóstaminnkunaraðgerð og greinir frá því að ákvörðunin hafi verið tekin eftir margra ára óánægju með brjóstastækkun sem hún fór í ung að aldri.

Aðgerðin fór fram á föstudag á stofu lýtalæknisins Stuart Linder í Beverly Hills í Kaliforníu. Myndskeið frá aðgerðinni sýnir Stodden á skurðarborðinu skömmu áður en hún var svæfð, þar sem hún hlustaði á tónlist með Britney Spears.

Samkvæmt umfjöllun TMZ voru eldri brjóstapúðar fjarlægðir og skipt út fyrir minni púða sem eiga að falla betur að líkamsbyggingu hennar. Læknirinn sagði nýju púðana veita eðlilegri hlutföll en halda þó ákveðinni fyllingu.

Stodden sagði í samtali við miðilinn að hún hefði lengi viljað fara í brjóstaminnkun, en talið að nú væri rétti tíminn til þess. Hún sagði ákvörðunina tengjast því að hún vildi endurheimta stjórn á eigin líkama eftir að hafa í mörg ár fundið fyrir mikilli athygli almennings á útliti sínu.

Hún sagðist hafa farið í fyrstu brjóstastækkunina 18 ára gömul, skömmu eftir að hún giftist leikaranum Doug Hutchison þegar hún var 16 ára en hann 51 árs.

Aðgerðin tókst vel að sögn læknisins og segir Stodden að breytingin muni meðal annars draga úr álagi á baki hennar. Hún útilokaði þó ekki frekari fegrunaraðgerðir í framtíðinni, meðal annars svokallaða „mommy makeover“-aðgerð ef hún eignast barn síðar meir.