Katrín Jakobsdóttir, fyrrverandi forsætisráðherra, segir reynslu sína af alþjóðasamstarfi undanfarin ár hafa styrkt sig í þeirri sannfæringu að hagsmunum Íslands sé betur borgið utan Evrópusambandsins.

Katrín var meðal ræðumanna á útifundi samtakanna Áfram Ísland á Austurvelli. Samtökin hvetja landsmenn til að greiða atkvæði gegn því að aðildarviðræður við Evrópusambandið verði teknar upp að nýju í þjóðaratkvæðagreiðslunni á laugardag.

Katrín lagði áherslu á mikilvægi þess að íslensk stjórnvöld hefðu fullt forræði yfir ákvörðunum og gætu gripið til þeirra úrræða sem hentuðu hverju sinni, „án þess að þurfa að fara á hnjánum til Brussel til að biðja um leyfi til að bjarga okkur með eigin leiðum.“

Meðal annarra ræðumanna á fundinum voru Áslaug Arna Sigurbjörnsdóttir, fyrrverandi ráðherra, og Auður Eir Vilhjálmsdóttir prestur. Halldór Benjamín Þorbergsson stýrði fundinum.

Snorri Másson þingmaður birti jafnframt mynd frá samkomunni á samfélagsmiðlum. Þar sást hann ásamt Ólafi Ragnari Grímssyni, fyrrverandi forseta Íslands, skemmtikraftinum Magga Mix og Samúel Guðmundssyni og virðast þeirra allir vera gallharðir Nei-menn.