Réttarhöld hófust í París í dag yfir frönskum skólaliða sem sakaður er um kynferðisbrot gegn leikskólabörnum. Málið er það fyrsta sinnar tegundar sem kemur fyrir dómstóla eftir að fjöldi ásakana um ofbeldi og misnotkun gagnvart börnum hefur komið upp í frönsku höfuðborginni undanfarna mánuði.

Hinn ákærði er sakaður um að hafa brotið kynferðislega gegn fimm börnum á aldrinum þriggja til fimm ára auk þess að hafa áreitt tvær samstarfskonur kynferðislega á tímabilinu frá september 2024 til apríl 2025. Hann neitar öllum ásökunum.

Málið hefur vakið mikla athygli í Frakklandi. Nýr borgarstjóri Parísar, Emmanuel Gregoire, hefur brugðist við með því að tilkynna um tugir tímabundinna brottvikninga og heitið því að herða eftirlit með starfsemi leik- og grunnskóla.

Fjölskyldur fjögurra annarra barna hafa einnig sakað manninn um kynferðisbrot, þó þau mál hafi ekki verið tekin fyrir af saksóknurum. Fyrir utan dómshúsið mótmæltu aðgerðarsinnar og kröfðust harðari refsinga fyrir kynferðisbrot gegn börnum.

Maðurinn á yfir höfði sér allt að tíu ára fangelsi og háa fjársekt verði hann sakfelldur.