Andrew Lownie, höfundur bókarinnar Entitled, hefur varið fullyrðingar sínar um að Sarah Ferguson hafi átt í kynferðislegu sambandi við rapparann Sean "Diddy" Combs.
Lownie, sem fjallaði um líf Andrew Mountbatten-Windsor og fyrrverandi eiginkonu hans Ferguson í bók sinni frá 2025, birti nýjar fullyrðingar um parið á dögunum.
Samkvæmt nýju kiljuútgáfu bókarinnar, Entitled: The Rise and Fall of the House of York, sem kom út 21. maí, á Diddy að hafa státað sig af kynlífi sínu með Ferguson og hitt hana á lúxushótelum, þar á meðal á hóteli þar sem gistinóttin kostaði meira en 50 þúsund pund.
Í broti úr bókinni sem birt var í Daily Mail um síðustu helgi skrifar Lownie að fyrrverandi starfsmaður hjá útgáfufyrirtæki Diddy, Bad Boy Records, hafi sagt rapparann hafa verið heltekinn af konungsfjölskyldunni og montað sig af því að hafa sofið hjá Ferguson.
Heimildarmaður fullyrðir einnig að Combs hafi eitt sinn sagt að hann „gæti ekki beðið eftir því að dætur Fergie næðu lögaldri“.
Á síðasta ári var Combs dæmdur í fjögurra ára og tveggja mánaða fangelsi eftir sakfellingu í alríkismáli sem tengdist vændi.
Í bókinni er einnig vitnað í annan samstarfsmann söngvarans sem segir Ferguson fyrst hafa hitt Combs í veislu sem Ghislaine Maxwell hélt árið 2002. Þar hafi hafist leynilegt „bólfélaga“-samband árið 2004 sem hafi staðið árum saman.
Maxwell, sem var vinkona Ferguson og fyrrverandi sambýliskona Jeffrey Epstein, var sakfelld fyrir mansal árið 2021 og fleiri brot tengd því að útvega Epstein stúlkur undir lögaldri.
Ferguson hafnar ásökununum alfarið
Heimildarmaður náinn Ferguson hafnaði hins vegar fullyrðingunum alfarið í samtali við The Sunday Times.
„Þetta er algjör uppspuni, augljóslega ósatt og enn ein fölsk ásökunin frá honum,“ sagði viðkomandi.
Lownie segir þó heimildir sínar traustar og byggðar á frásögnum margra einstaklinga.
„Ég stend við þetta. Þetta er vel heimildað með fyrrverandi starfsmönnum P Diddy og Söru Ferguson,“ sagði hann og bætti við að Ferguson hefði áður verið staðin að því að ljúga um að hafa slitið tengslum við Epstein árið 2011.
Í september síðastliðnum kom fram tölvupóstur þar sem Ferguson kallaði Epstein „æðsta vin“ sinn og baðst afsökunar á að hafa gagnrýnt hann opinberlega, aðeins nokkrum vikum eftir að hún sagðist ekkert vilja hafa með hann að gera.
Í kjölfarið hættu nokkur góðgerðarfélög samstarfi við hana sem verndara og sendiherra.
Kiljuútgáfa bókarinnar inniheldur einnig fleiri umdeildar fullyrðingar, meðal annars að ilmvatn fyrir karlmenn sem Diddy gaf út árið 2006 undir nafninu Unforgivable hafi verið innblásið af Ferguson og því hvernig hún vildi að karlmenn lyktaði.
Lownie heldur því jafnframt fram að Ferguson hafi oft kynnt dætur sínar fyrir Combs, meðal annars í snekkjuveislu árið 2006 þegar Evgenía prinsessa var sextán ára gömul.
„Veislur Sean voru trylltar. Það var sláandi að hún skyldi hafa tekið Eugenie með sér þangað,“ á starfsmaður konungsfjölskyldunnar að hafa sagt við höfundinn.
