Brasilíski vaxtarræktar- og samfélagsmiðlastjarnan Gabriel Ganley er látinn, samkvæmt fjölmiðlum í Brasilíu og tilkynningu frá styrktaraðila hans. Hann var með milljónir fylgjenda á samfélagsmiðlum og naut mikilla vinsælda fyrir æfingamyndbönd, vaxtarræktarefni og hvatningarinnlegg.
Samkvæmt fréttum fann vinur Ganley hann látinn á laugardagsmorgun á heimili hans í São Paulo í Brasilíu. Lík hans fannst í eldhúsi íbúðarinnar. Málið er rannsakað sem grunsamlegt andlát.
Dánarorsök hefur enn ekki verið staðfest.
Fyrirtækið Integralmedica, sem var meðal styrktaraðila Ganley, greindi fyrst frá andláti hans í yfirlýsingu á samfélagsmiðlum.
„Í dag misstum við meira en hæfileikaríkan og staðfastan íþróttamann. Við misstum áhrifavald sem hvatti þúsundir ungs fólks daglega með orku sinni, aga og einlægni,“ sagði í yfirlýsingunni.
Ganley hafði byggt upp gríðarlegan fylgjendahóp á netinu með efni tengdu líkamsrækt og heilbrigðum lífsstíl. Hann var með yfir tvær milljónir fylgjenda á Instagram, meira en eina milljón á TikTok og nærri hálfa milljón áskrifenda á YouTube.
