Bresk kona segist hafa unnið 12 milljónir punda, jafnvirði rúmlega tveggja milljarða íslenskra króna, í lottói en þarf nú að bíða í allt að 30 daga eftir því að fá staðfest hvort hún sé í raun rétti vinningshafinn. Ástæðan er sú að verslunarmaður henti vinningsmiðanum í ruslið.

Kath Main, 46 ára, rakst á frétt á netinu um að enginn hefði enn gert tilkall til 12 milljóna punda vinnings í útdrætti 6. júní. Þegar hún skoðaði vinningsnúmerin brá henni í brún því þau reyndust vera nákvæmlega þau sömu og hún hefur spilað með í 20 ár.

Móðir hennar, Fiona, hafði farið með miðann í Londis-verslun í Abercynon í Suður-Wales til að láta yfirfara hann. Að sögn fjölskyldunnar sagði starfsmaður verslunarinnar að miðinn væri ekki með vinning og móðirin samþykkti því að honum yrði hent.

„Mér líður bara illa allan tímann. Það versta er óvissan og biðin,“ sagði Kath í samtali við The Sun.

„Ég sá að það var ósóttur lottóvinningur, athugaði númerin og áttaði mig á að þau voru mín. Ég hringdi í mömmu og spurði: „Þú keyptir miðann, er það ekki?“ Hún svaraði: „Jú.“

„Ég sagði: „Við unnum í lottóinu.“ Hún svaraði: „Ég lét athuga miðann og það var enginn vinningur.“

„Ég sagði: „Nei, þetta er vinningsmiði, við unnum.“ Hún spurði: „Hvað mikið?“ Ég svaraði: „12 milljónir punda.“ Þá sagði hún: „Það getur ekki verið, miðinn er kominn í ruslið.““

Þegar Kath áttaði sig á mistökunum höfðu ruslatunnurnar þegar verið tæmdar.

Hún hefur upplýst lottósöluaðilann Allwyn um málið og lagt fram bæði kvittun fyrir kaupunum og upptökur úr dyrabjöllumyndavél hárgreiðslustofu sem sýna móður hennar fara með miðann í verslunina.

Kath spurði fyrirtækið hvort skanni verslunarinnar gæti hafa bilað.

„Ég spurði Allwyn hvort tækið gæti hafa verið bilað ef það gaf ekki frá sér hljóð. Þau sögðu að það væri möguleiki en mjög ólíklegt. Þau sögðu að þetta gæti líka hafa verið mannleg mistök.“

Eigandi Londis-verslunarinnar, Karan Kumar, sagði rannsókn standa yfir.

„Nú er verið að rannsaka málið. Það væri stórkostlegt ef hún hefði raunverulega unnið.“

Allwyn segir að rannsókn geti tekið allt að 30 daga.

„Ég hlýt að vera óheppnasti lottóvinningshafinn sem til er, því ég er ekki með peningana,“ sagði Kath. „Ég reyni að hugsa ekki um hvað ég myndi gera við vinninginn, svona ef ég fæ hann svo ekki.“

Talsmaður Allwyn sagði að breska þjóðarlottóið væri „eina stóra lottóið sem gerir spilurum kleift að gera tilkall til vinninga þótt vinningsmiði hafi glatast, verið stolið eða eyðilagst.“