Pentagon birti í gær nýjan pakka með 64 skjölum og upptökum sem tengjast UFO-fyrirbærum, eða svokölluðum UAP-fyrirbærum, líkt og Mannlíf greindi frá í gær. Um er að ræða aðra birtingu gagna sem gerð er opinber samkvæmt forsetatilskipun frá Donald Trump fyrr á þessu ári.
Gögnin eru aðgengileg á sérstakri UFO-vefsíðu Pentagon og innihalda sex PDF-skjöl, sjö hljóðskrár og 51 myndskeið.
Myndböndin sýna meðal annars upptökur úr herflugvélum af óútskýrðum fyrirbærum á himni, ásamt ítarlegum lýsingum á hverju atviki.
Þetta kemur tveimur vikum eftir að fyrsta gagnasafnið var birt, en þar voru meðal annars afhjúpuð FBI-skjöl, skýrslur herflugmanna um dularfull atvik, diplómatísk skjöl og ljósmyndir frá geimleiðöngrum NASA.
Nýju myndskeiðin innihalda meðal annars kornóttar innrauðar upptökur sem hafa orðið kunnuglegar undanfarin ár úr búnaði bandaríska hersins.
Pentagon segir að þingmenn hafi óskað eftir myndböndunum í mars og að þau hafi fundist hjá All-domain Anomaly Resolution Office, rannsóknardeild hersins sem rannsakar UFO- og UAP-atvik.
Tekið er fram að mörg gagnanna hafi ekki fullkomlega staðfesta upprunasögu.
Eitt athyglisverðasta myndbandið virðist sýna augnablikið þegar orrustuþota skaut niður óþekktan hlut yfir Lake Huron árið 2023, atvik sem vakti mikla athygli eftir kínverska njósnabelgsmálið. Síðar komu þó fram vísbendingar um að hluturinn gæti hafa verið loftbelgur frá áhugamannahópi.
Annað myndband frá árinu 2022 sýnir margar kúlulaga einingar fara ofan í og upp úr sjónum nærri kafbáti. Ekki kemur fram hvar upptakan var gerð.
Skjölin innihalda einnig eldri frásagnir af UFO-sýnum, skýrslu um sovéska leyniþjónustustarfsemi og gögn frá bandaríska orkumálaráðuneytinu um UFO-atvik, þar á meðal frá PANTEX, mikilvægri kjarnorkuvopnastöð í Bandaríkjunum.
Mest athygli hefur þó vakið frásögn starfandi háttsetts leyniþjónustumanns sem lýsir UFO-rannsókn í þyrluflugi síðla árs 2025.
Samkvæmt skýrslunni urðu hann og áhöfnin fyrir „röð náinna kynna af UAP-fyrirbærum“ sem stóðu yfir í meira en klukkustund.
„Í fjarska sáum við ótal appelsínugular kúlur sveima í allar áttir með fjöllin í bakgrunni. Sýningin stóð yfir í nokkrar mínútur áður en hún dofnaði,“ skrifaði embættismaðurinn.
Hann sagði einnig að tveir stórir ljósboltar hefðu birst skyndilega rétt við þyrluna.
„Flugmennirnir og ég sáum með berum augum tvær stórar kúlur kvikna hlið við hlið, kyrrstæðar rétt fyrir ofan snúningsdisk þyrlunnar hægra megin. Þær voru sporöskjulaga, appelsínugular með hvítum eða gulum kjarna og sendu frá sér ljós í allar áttir.“
Að sögn embættismannsins voru hann og áhöfnin „nánast orðlaus“ eftir upplifunina.
Þá voru hljóðskrár birtast sem innihalda meðal annars samskipti geimfara í Apollo-leiðangri og Project Mercury þar sem rætt er um fyrirbæri sem lýst var sem „eldflugum“ og „snjókornum“.
Pentagon bendir þó á að NASA hafi síðar komist að þeirri niðurstöðu að „eldflugurnar“ hafi í raun verið frosin þétting sem losnaði frá geimförunum og endurkastaði sólarljósi.
