Héraðssaksóknari hefur ákveðið að kæra til Landsréttar úrskurð Héraðsdóms Reykjaness um að vísa frá sakamáli gegn hjartalækninum Skúla Tómasi Gunnlaugssyni. Þetta staðfestir Ólafur Þór Hauksson héraðssaksóknari í samtali við RÚV.

Skúli Tómas var ákærður fyrir manndráp og brot gegn lögum um heilbrigðisstarfsmenn vegna andláts konu sem var í umsjá hans á Heilbrigðisstofnun Suðurnesja árið 2019.

Héraðsdómur vísaði málinu frá í vikunni með þeim rökum að Skúla Tómasi hefði þegar verið gerð refsing fyrir sama atvik þegar hann var sviptur lækningaleyfi árið 2021. Dómurinn taldi að frekari sakamálsmeðferð kynni að brjóta gegn ákvæði Mannréttindasáttmála Evrópu sem bannar tvöfalda refsingu fyrir sama brot.

Skúli Tómas fékk lækningaleyfi sitt aftur árið 2024 og greint var frá því í gær að hann muni á næstunni hefja störf á ný á Landspítalanum. Forsvarsmenn spítalans hafa sagt að ekkert standi því í vegi að svo stöddu, en að staðan verði endurmetin ef niðurstaða fæst síðar á æðra dómstigi.