Hjón létust og fimm til viðbótar slösuðust, þar á meðal unglingur, í drónaárás Úkraínu á rússnesku borgina Rostov við Don í nótt. Þetta segir ríkisstjóri Rostov-héraðs, Yuri Slyusar.

Samkvæmt yfirvöldum féllu drónar á þrjú hverfi borgarinnar og kviknaði í einkafyrirtæki, nokkrum vöruhúsum og fleiri einkahúsum. Einnig kviknaði í nokkrum bifreiðum.

Rúður brotnuðu í fjölda húsa, á efstu hæðum fjölbýlishúss og í húsnæði félagsþjónustu.

Myndir og myndskeið sem vitni birtu á samfélagsmiðlum sýna að dróni hæfði fjölbýlishús og olli skemmdum á nokkrum íbúðum. Íbúar hússins voru fluttir á brott í öryggisskyni.

Óháða Telegram-rásin Astra greinir jafnframt frá því, með vísan til myndefnis frá vettvangi, að reykur hafi sést stíga upp frá höfninni í Rostov.

Úkraínskir drónar gerðu einnig árásir á önnur svæði í Rússlandi í nótt. Í Belgorod varð miðborgin fyrir árás þar sem íbúðarhús skemmdust og 12 manns slösuðust, að sögn staðaryfirvalda.