Lögreglan í Nebraska rannsakar nú óvenjulegt skotvopnaslys þar sem hundur er sagður hafa hleypt af haglabyssu inni í kyrrstæðum pallbíl.

Atvikið átti sér stað á laugardag í borginni Scottsbluff þegar lögreglu barst tilkynning um skothvell nærri verslun. Á vettvangi fannst pallbíll með miklum skemmdum eftir að haglaskot fór í gegnum farþegahurð ökutækisins.

Samkvæmt upplýsingum lögreglu hafði eigandi bílsins skilið svartan labradorhund eftir inni í bílnum á meðan hann fór inn í verslun að kaupa vörur. Talið er að hundurinn hafi færst til í aftursæti bílsins og með einhverjum hætti komið við hlaðna haglabyssu sem var inni í ökutækinu.

Skotið fór í gegnum hurð bílsins og hæfði konu sem beið á rauðu ljósi skammt frá, með handlegg út um gluggann á bifreið sinni. Hún hlaut áverka á upphandlegg en meiðslin reyndust ekki lífshættuleg. Fjölskyldumeðlimur flutti hana á sjúkrahús þar sem hún fékk aðhlynningu.

Málið er enn til rannsóknar hjá lögreglu. Þá hafa yfirvöld minnt á að ólöglegt sé samkvæmt lögum í Nebraska að ferðast með hlaðna haglabyssu inni í ökutæki.