Verðlaunarithöfundurinn Stefán Máni Sigþórsson veltir fyrir sér nýlegri tísku, ef svo mætti kalla, í sundlaugum landsins sem hann virðist ekki vera hrifinn af.
„Það byrjaði skrýtið fyrirbæri fyrir nokkrum árum. Ungir menn sem fara í sturtu fyrir sund í skýlunni, og þegar þeir fara upp úr, vefja þeir um sig handklæði og laumast svo úr skýlunni,“ skrifar Stefán í færslu á Twitter.
„Hvaða wimpy kid gay syndrome er þetta helvíti?“ spyr rithöfundurinn.
Mannlíf fjallaði um svipað árið 2023 og árið 2024 en þá skapaðist mikil umræða í samfélaginu um unga karlmenn sem fara í nærbuxum í sturtu og fara svo í sundbuxur yfir nærbuxurnar.
„Þetta er menning hjá ungum drengjum,“ sagði Árni Jónsson, þáverandi forstöðumaður Laugardalslaugar, í samtali við Mannlíf árið 2023. „Ég veit ekki hver yngsti aldurinn er en þetta eru ungir drengir frá svona 14-15 upp í 25-27. Ég hef alveg rætt við drengi sem segjast vera í hreinum nærbuxum en þú þarft að vera í viðurkenndum fatnaði samkvæmt reglugerð og nærbuxur eru ekki viðurkenndur sundfatnaður.“
Skítur og skilti
„Með hverjum einstaklingi sem fer ekki í sturtu sem fer ofan í laugina er gert ráð fyrir um 1,4 grömm af skít komi í laugina. Þú getur ímyndað þér hvað mikill skítur er að koma með hverjum dreng sem kemur beint af æfingu þar sem svitinn hefur lekið niður bakið í rassaskoruna, sem hreinsast vel þarna í nærbuxurnar, og svo hreinsa þeir nærbuxurnar í heita pottinum þar sem ég er að reyna baða mig,“ sagði Árni.
Þá fjallaði Mannlíf árið 2024 um skilti sem hafði verið komið fyrir í búningsklefum karla í sundlaugum Reykjavíkur til að minna á að nærbuxur eiga ekki heima í sundlaugum.
