Fjöldi umferðarlagabrota kom inn á borð lögreglu í gærkvöldi og nótt, auk tilkynninga um innbrot, hótanir og einstakling sem neitaði að greiða fyrir veitingar á veitingastað.
Ökumaður var kærður fyrir hraðakstur í Mosfellsbæ eftir að hafa mælst á 148 kílómetra hraða þar sem leyfður hámarkshraði er 70 kílómetrar á klukkustund.
Tveir aðrir ökumenn voru kærðir fyrir hraðakstur eftir að hafa báðir mælst á 122 kílómetra hraða þar sem hámarkshraði er 80. Annar þeirra var stöðvaður í Garðabæ og hinn í Hafnarfirði. Þá var ökumaður stöðvaður fyrir að aka sviptur ökuréttindum og var málið sett í hefðbundið ferli.
Í Árbænum var ökumaður stöðvaður fyrir að aka gegn rauðu ljósi. Hann játaði brotið. Tveir ökumenn til viðbótar voru stöðvaðir í Árbænum vegna gruns um akstur undir áhrifum ávana- og fíkniefna. Þá var ökumaður kærður þar fyrir að aka bifreið á nagladekkjum og má hann eiga von á sekt.
Í Mosfellsbæ var ökumaður stöðvaður vegna gruns um akstur undir áhrifum áfengis.
Lögreglu barst jafnframt tilkynning um innbrot á heimili í Árbæjarhverfi og er málið til rannsóknar.
Í Reykjavík var tilkynnt um öskur og hótanir frá einstaklingi. Lögregla leitaði að viðkomandi en fann hann ekki. Þá var einstaklingi vísað af hóteli þar sem hann var ekki velkominn.
Loks var lögreglu tilkynnt um einstakling á veitingastað í miðbæ Reykjavíkur sem hafði pantað sér veitingar en neitaði að greiða fyrir þær. Málið var sett í hefðbundið ferli hjá lögreglu.
