Það er ekki á hverjum degi sem heimsfrægir leikarar stinga niður penna til að skrifa um menntamál á Íslandi en það gerðist svo sannarlega í gær. Í færslu á Facebook greindi Jóhannes Haukur Jóhannesson, sem lék meðal annars í Game of Thrones og Captain America: Brave New World, frá því að börn á yngstu stigum grunnskóla á Íslandi væru neydd til þess að nota samfélagsmiðla sem hluti af náminu.
Vægast sagt voru margir í sjokki yfir þessari frásögn Jóhannesar.
Til allrar hamingju kom fljótlega í ljós stórleikarinn var stórlega að misskilja málið. Var hann þar að vísa í snjallforrit sem er ætlað foreldrum og kennurum til að skrásetja heimalestur barna og flokkast ekki í neinum skilningi sem samfélagsmiðill.
Allir geta gert mistök og Jóhannes er engan veginn undanþeginn því. Það er hins vegar ekki hægt að fá aðra töku eins og í kvikmyndageiranum þegar svo óábyrgum fullyrðingum er kastað fram. Það er vonandi að leikarinn læri af mistökum sínum ...
