Ein kona fannst látin undir rústum fjölbýlishúss sem hrundi í austurhluta Þýskalands fyrr í vikunni. Lögreglan í bænum Görlitz staðfesti það í dag eftir umfangsmikla leit björgunarsveita á svæðinu.

Að sögn lögreglu fannst konan seint í gær eftir að leitarhundur hafði gefið merki um líkamsleifar undir rústunum. Hún reyndist vera 25 ára gömul kona frá Rúmeníu sem hafði verið saknað frá því húsið hrundi á mánudag.

Björgunarsveitir hafa unnið nær sleitulaust að leitinni, að mestu með handverkfærum, þar sem óttast hefur verið að notkun þungavinnuvéla gæti valdið gasíkveikju á svæðinu. Rústirnar samanstanda meðal annars af múrsteinum og brotnu timbri úr orlofsíbúðahúsinu sem féll saman síðdegis á mánudag.

Tveggja einstaklinga er enn saknað eftir slysið. Um er að ræða 26 ára gamla konu frá Rúmeníu og 48 ára gamlan mann með þýskt og búlgarskt ríkisfang.

Orsök hrunsins liggur enn ekki fyrir og segir lögregla rannsókn málsins standa yfir samhliða áframhaldandi björgunaraðgerðum og leit að þeim sem enn er saknað.

Alls hafa um 140 manns tekið þátt í aðgerðunum, þar á meðal lögregla, slökkvilið og heilbrigðisstarfsfólk. Þá hafa pólskar björgunarsveitir einnig komið að leitinni.

Bærinn Görlitz, sem er austasti bær Þýskalands við landamærin að Póllandi, er þekktur fyrir sögulegar byggingar sínar og hefur oft verið nýttur sem tökustaður kvikmynda.