Áhyggjur eru meðal íbúa í Kópavogi vegna umferðaröryggis barna og annarra gangandi vegfarenda. Móðir á Kársnesi segir ítrekað hafa komið fyrir að ökumenn stöðvi ekki fyrir sex ára dóttur hennar þegar hún bíður við gangbraut á leið sinni í skólann.
María Magnúsdóttir vakti athygli á málinu í Facebook hópnum Kársnesið Okkar. Þar lýsir hún áhyggjum sínum af hegðun ökumanna og hvetur þá til þess að sýna meiri aðgát í umferðinni.
„Ég hef ítrekað orðið vitni að því að 6 ára dóttir mín stendur við gangbraut á leið í skólann og akandi vegfarendur stoppa ekki til að hleypa henni yfir,“ skrifar María.
Hún minnir jafnframt ökumenn á skyldur þeirra gagnvart gangandi vegfarendum við gangbrautir og spyr hvort ekki sé hægt að gera betur þegar kemur að öryggi þeirra sem fara um Kársnesið fótgangandi.
Segir ökumann hafa tekið fram úr á Kópavogsbraut
Fleiri íbúar tóku undir áhyggjur Maríu. Ragnheiður Júlía Ragnarsdóttir segir mikilvægt að ökumenn dragi úr hraða og bendir á að hámarkshraði sé víða 30 kílómetrar á klukkustund á Kársnesi.
Hún lýsir jafnframt atviki sem hún varð fyrir á Kópavogsbraut þegar ökumaður tók fram úr henni þrátt fyrir að hún hefði sjálf verið á rúmlega 30 kílómetra hraða.
„Það liggur engum svona mikið á að líf vegfarenda þurfi að liggja við,“ skrifar Ragnheiður.
Gestur Valgarðsson tekur í sama streng og segir ökumenn þurfa að vera sérstaklega varkára og sýna gangandi vegfarendum virðingu.
Segir sama vandamál vera á Digranesvegi
Umræðan virðist ekki eingöngu bundin við Kársnesið. Katrín Steinarsdóttir segir sambærilegt vandamál hafa verið viðvarandi á Digranesvegi um árabil.
Hún segist í gegnum tíðina hafa orðið vitni að atvikum þar sem litlu munaði að börn hennar og annarra yrðu fyrir bíl. Hún lýsir ástandinu sem alvarlegu vandamáli og segir meðal annars hafa komið fyrir að ökumaður hafi ekið yfir gangbraut þrátt fyrir rautt ljós.
Færslurnar sýna að nokkrir íbúar hafa verulegar áhyggjur af umferðaröryggi barna í Kópavogi. Sérstök áhersla er lögð á að ökumenn virði gangbrautir, dragi úr hraða og sýni aukna aðgát þar sem börn eru á ferli, ekki síst á morgnana þegar þau eru á leið í skóla.
