Krabbamein Joe Biden, fyrrverandi forseta Bandaríkjanna, hefur dreift sér enn frekar þrátt fyrir meðferð sem hann hefur gengist undir. Hunter Biden, sonur forsetans fyrrverandi, greindi frá þessu í viðtali við BBC Newsnight.

Biden, sem er 83 ára, greindi frá því í maí á síðasta ári að hann hefði verið greindur með ágengt blöðruhálskirtilskrabbamein sem hefði þegar dreift sér í bein. Greiningin kom aðeins fjórum mánuðum eftir að hann lét af embætti forseta Bandaríkjanna.

Síðan þá hefur Biden gengist undir meðferð við sjúkdómnum, meðal annars geislameðferð og hormónameðferð. Í síðasta mánuði sagði hann sjálfur að meðferðin gengi „mjög vel“ þegar hann kynnti væntanlega ævisögu sína.

Hunter Biden sagði hins vegar í viðtalinu, sem birt var á föstudagskvöld, að sjúkdómurinn hefði haldið áfram að breiðast út.Hann bætti við að veikindin væru föður sínum mjög sársaukafull og hefðu mikil áhrif á hann.

Hunter varð sýnilega tilfinningaríkur þegar hann ræddi heilsu föður síns og sagði erfitt að fylgjast með veikindunum. Þrátt fyrir ástandið héldi faðir hans áfram að vera virkur og hefði enn mikla trú á Bandaríkjunum og framtíð landsins.

Heilsa Biden var mikið til umræðu á síðustu árum forsetatíðar hans. Hann var elsti sitjandi forseti í sögu Bandaríkjanna og ákvað upphaflega að sækjast eftir öðru kjörtímabili í forsetakosningunum árið 2024.

Eftir slaka frammistöðu í kappræðum við Donald Trump í júní það ár og vaxandi þrýsting innan Demókrataflokksins dró Biden framboð sitt til baka. Kamala Harris, þáverandi varaforseti, tók við sem forsetaframbjóðandi demókrata en tapaði kosningunum fyrir Trump.