Baader-Meinhof-liðkonan Daniela Klette hefur verið dæmd í 13 ára fangelsi af þýskum dómstóli fyrir þátttöku í röð vopnaðra rána sem framin voru meðan hún var á flótta undan yfirvöldum í rúma þrjá áratugi.

Klette, sem er 67 ára gömul, var handtekin í íbúð sinni í Berlín í febrúar árið 2024 eftir umfangsmikla leit lögreglu. Hún hafði verið eftirlýst í tengslum við starfsemi samtakanna, sem voru meðal alræmdustu öfgasamtaka í Þýskalandi á síðari hluta 20. aldar.

Klette var sakfelld fyrir sex alvarleg rán, fjárkúgun og brot á vopnalögum. Samkvæmt saksóknurum stálu hún og tveir samverkamenn hennar alls um 2,4 milljónum evra í ránunum sem áttu að fjármagna líf þeirra í felum eftir að samtökin voru leyst upp árið 1998.

Saksóknarar sögðu Klette meðal annars hafa ekið flóttabifreiðum og borið eftirlíkingu af sprengivörpu á meðan aðrir þátttakendur voru vopnaðir árásarrifflum.

Stuðningsmenn hennar mættu í réttarsalinn við dómsuppkvaðninguna og hrópuðu slagorð til stuðnings henni, þar á meðal „Frelsið Danielu!“.