Mark Fuhrman, fyrrverandi rannsóknarlögreglumaður hjá lögreglunni í Los Angeles, sem varð heimsþekktur í réttarhöldunum yfir O. J. Simpson, er látinn, 74 ára að aldri.
Samkvæmt TMZ lést Fuhrman af ágengri tegund hálskrabbameins sem greindist hjá honum á síðasta ári. Hann hafði legið á sjúkrahúsi í um viku áður en hann lést og hafði farið í krabbameinsmeðferð, en ákvað síðar að hætta henni. Ekki verður haldin útför.
Fuhrman bjó síðustu ár í Idaho og staðfesti dánardómstjóri Kootenai-sýslu að hann hefði látist 12. maí síðastliðinn.
Hann lét af störfum hjá lögreglunni í ágúst árið 1995 og hóf í kjölfarið feril sem höfundur sakamálabóka. Hann starfaði einnig sem sjónvarps- og útvarpsmaður og kom meðal annars fram sem sérfræðingur hjá Fox News.
Fuhrman varð umdeild persóna í réttarhöldunum yfir Simpson þar sem hann fann blóðugan hanska sem talinn var lykilsönnunargagn í morðunum á Nicole Brown Simpson og Ron Goldman.
Varnarteymi Simpsons birti hins vegar upptökur þar sem Fuhrman notaði n-orðið, þrátt fyrir að hann hefði neitað því undir eiði að hafa notað slíkt orðalag.
Upptökurnar sköðuðu trúverðugleika hans verulega og héldu lögmenn Simpsons því fram að mögulega hefði hann komið sönnunargögnum fyrir á vettvangi.
Árið 1996 játaði Fuhrman sök í meinsæri fyrir að hafa logið um orðalag sitt við vitnisburðinn í málinu. Hann varð þar með eini einstaklingurinn sem sakfelldur var fyrir refsivert brot tengt morðunum á Nicole Brown Simpson og Ron Goldman.
Í maí 2024 var honum einnig bannað að snúa aftur til lögreglustarfa í Kaliforníu vegna sakfellingarinnar í tengslum við Simpson-málið.
