Connor Murphy, áhrifavaldur á sviði líkamsræktar og svokallaðs looksmaxxing, er sagður hafa látist eftir slys í Taílandi. Hann var 32 ára gamall.

Samkvæmt taílenska miðlinum Thai Rath kom Murphy með leigubíl að lúxusíbúðahverfi á þriðjudag og er sagður hafa sýnt óvenjulega og óútreiknanlega hegðun. Hann hafi reynt að komast inn í annan bíl, en ökumaðurinn neitað vegna framkomu hans. Í kjölfarið hafi Murphy orðið æstur og byrjað að hrópa.

Íbúar á svæðinu kölluðu á lögreglu en þegar lögreglumenn komu á vettvang er Murphy sagður hafa flúið í gegnum hverfið og stokkið út í stöðuvatn. Þar synti hann þar til hann örmagnaðist og drukknaði að sögn yfirvalda.

Kafarar frá Poh Teck Tung Foundation leituðu að Murphy í um hálftíma áður en þeir fundu lík hans og komu því á land.

Kærasta Murphys, sem ræddi við fjölmiðla undir dulnefni, sagði að ekkert hefði bent til þess að eitthvað amaði að honum og kvaðst aldrei hafa séð hann neyta fíkniefna.

Í frétt Thai Rath kemur þó fram að leiguhúsnæði hans hafi verið alsett málningarslettum. Þá fundu lögreglumenn frá Bang Phli-lögreglustöðinni tvær ónotaðar sprautur í bifreið hans auk óþekktra hvítra taflna.

Rannsókn á tildrögum málsins stendur yfir.

Murphy varð þekktur um miðjan síðasta áratug á YouTube, þar sem hann birti myndbönd um vaxtarrækt og líkamsrækt. Hann lýsti sjálfum sér gjarnan sem „giga chad“, sem er slangur yfir karlmann sem þykir mjög sjálfsöruggur og í framúrskarandi líkamlegu formi.

Hann átti samtals um 2,6 milljónir fylgjenda á Instagram og YouTube.

Hér má sjá myndskeið af slysinu en viðkvæmir eru varaði við myndefninu.