Maður í Indiana í Bandaríkjunum skar af sér getnaðarliminn og kveikti síðan í honum með bensíni og kveikjurum, að sögn lögmanns hans.
Samkvæmt lögmanninum, David Feltz, sagði Christopher Peden lögreglu að hann hefði farið inn í bílskúr í Fort Wayne og skorið af sér getnaðarliminn með eldhúshnífi.
Lögmaðurinn segir að Peden hafi því næst lagt liminn á gólfið, hellt yfir hann bensíni úr íláti og kveikt í honum með fjórum kveikjurum.
Lögregla og slökkvilið voru kölluð á vettvang 6. maí eftir að tilkynning barst um stunguárás í bílskúr við íbúðarhús. Eigendur hússins vöknuðu þegar nágranni gerði þeim viðvart um eld í bílskúrnum og áttuðu sig þá á því að Peden, sem er fjölskyldumeðlimur þeirra, var horfinn.
Á leið á vettvang fundu lögreglumenn Peden, sem hélt því ranglega fram að ókunnugur maður hefði stungið hann í miðbænum og hótað honum daginn áður.
Eftir að hann var fluttur á sjúkrahús mun hann hins vegar hafa viðurkennt við rannsóknarlögreglu að frásögn hans hefði verið ósönn og játað að hafa skorið liminn af sér sjálfur.
Í kjölfarið var hann vistaður í fangelsi í Allen-sýslu og ákærður fyrir íkveikju. Samkvæmt talsmanni fangelsisins er hann nú laus úr haldi.
Lögmaður Peden segir skjólstæðing sinn vera í stöðugu ástandi og að unnið sé að því að afla frekari upplýsinga vegna varnar málsins. Þá sé einnig verið að kanna geðrænt ástand hans þegar atvikið átti sér stað.
