Tæplega 700 einstaklingar bíða nú eftir hjúkrunarrými, sem er mesti fjöldi sem mælst hefur hér á landi. Af þeim eru 127 í tímabundnu biðrými á sjúkrahúsum eða heilbrigðisstofnunum og bíða þar eftir varanlegu úrræði.
Sigurjón Norberg Kjærnested, framkvæmdastjóri Samtaka fyrirtækja í velferðarþjónustu, segir að hluti vandans sé að ekki hafi verið nægilega skýrt innan stjórnsýslunnar hver beri ábyrgð á því að byggja upp hjúkrunarrými.
„Við á hjúkrunarheimilunum finnum fyrir því að við erum að fá sífellt til okkar eldra fólk og veikara fólk. Og það er því mjög mikilvægt að vinna í því að byggja upp fleiri hjúkrunarrými á réttum stöðum og viðeigandi úrræði fyrir þennan hóp af fólki,“ segir Sigurjón í samtali við RÚV.
Uppbygging ekki haldið í við þörfina
Í dag eru um 3.000 hjúkrunarrými í landinu og er gert ráð fyrir að 120 bætist við á þessu ári. Næstu þrjú árin hyggjast stjórnvöld fjölga þeim um 600 til viðbótar, eða tæplega 200 á ári. Þetta er aukning frá fyrri árum þar sem aðeins var bætt við um 40 rýmum árlega frá 2017 til 2024.
Sigurjón telur þessa hægu fjölgun hafa átt þátt í þeirri stöðu sem nú er uppi. Þar að auki fjölgi eldra fólki stöðugt, sem eykur eftirspurnina enn frekar.
„Og svo hefur kerfið í kringum uppbygginguna ekki verið nægilega gott. Það hefur ekki verið nægilega skýrt hver ber ábyrgð á uppbyggingunni og hefur verið mikilvægt að laga það. Og núna eru uppi áform á vegum stjórnvalda að gera það, og það er mjög mikilvægt,“ segir hann.
Þjónustan á að snúast um fólkið
Sigurjón leggur áherslu á að hjúkrunarheimili séu heimili íbúanna, ekki vinnustaðir starfsfólksins.
„Fyrir okkur eru hjúkrunarheimili heimili fólks. Og það er mjög mikilvægt að fólk fái að verja þessum síðustu árum sínum á stað þar sem þau vilja búa, velja sér heimili og þar sem við getum þjónustað þau sem best,“ segir hann og bæti við að lokum: „Við sem störfum á hjúkrunarheimilum erum að vinna inni á heimilum fólks, þau eru ekki að búa inni á okkar vinnustað. Það er mjög mikilvægt að fólk fái að vera þar sem það vill og við getum þjónustað þau eins og þau eiga skilið.“
