Sex herbergja parhús við Langholtsveg 167 í Reykjavík hefur verið sett á sölu á 134,9 milljónir króna.

Það eru þau Helga Helgadóttir og Gunnar Jarl Jónsson sem selja húsið en Gunnar Jarl var árum saman besti knattspyrnudómari Íslands áður en hann lagði flautuna á hilluna árið 2017.

Um er að ræða glæsilega fjölskyldueign á góðum stað í Laugardalnum sem var byggð árið 1969.

Eignin er á tveimur hæðum og er skipulag hennar sagt henta sérstaklega vel fyrir fjölskyldur. Á efri hæð eru fimm svefnherbergi ásamt baðherbergi, en á neðri hæð er rúmgóð og björt stofa og borðstofa. Frá borðstofu er útgengt út á stóran pall sem snýr til suð-austurs.

Við hlið stofu er eldhús með þvottahúsi inn af því, auk þess sem gestasalerni er staðsett við forstofu. Geymsla er í kjallara með sérinngangi á vesturhlið hússins.

Eignin stendur ofarlega við Langholtsveg og fylgir henni barnvænn og rúmgóður bakgarður með skjólveggjum og þremur pöllum. Garðurinn nýtist vel og býður upp á fjölbreytta möguleika til útivistar og samveru.

Húsið var teiknað af arkitektinum Kjartani Sveinssyni og hefur samkvæmt sölulýsingu verið vel við haldið í gegnum tíðina.