Héraðsdómur Reykjavíkur kvað nýlega upp dóm yfir Sigmundi Þóri Jónssyni vegna tveggja kynferðisbrota en Sigmundur játaði brotin.
Í fyrri ákæru, sem gefin var út 3. mars 2026, var honum gefið að sök að hafa í september 2025 berað kynfæri sín og fróað sér utandyra í Reykjavík með þeim afleiðingum að vitni sá til hans og á þannig sýnt af sér „ósiðlegt og lostugt athæfi“ eins og það er orðað í dómnum. Var háttsemin talin brjóta gegn ákvæði almennra hegningarlaga um blygðunarsemisbrot.
Í síðari ákæru, frá 10. mars 2026, var hann sakfelldur fyrir að hafa haft í vörslum sínum mikið magn af teiknuðu myndefni sem sýnir börn á kynferðislegan og klámfenginn hátt. Efnið fannst við húsleit og var geymt á farsíma og tölvubúnaði hans.
Dómurinn taldi sannað með játningu og gögnum málsins að Sigmundur væri sekur um bæði brotin. Við ákvörðun refsingar var litið til fyrri sakaferils hans, en hann hafði áður hlotið skilorðsbundna dóma fyrir sambærileg brot. Þá var tekið tillit til þess að hann hafði verið samvinnufús við rannsókn málsins og játað brot sín greiðlega.
Sigmundur var dæmdur í átta mánaða fangelsi, en fullnustu fimm mánaða var frestað með tveggja ára skilorði. Á skilorðstímanum skal hann sæta eftirliti og meðferð, meðal annars hjá úrræðinu „Taktu skrefið“. Þá var jafnframt ákveðið að gera upptækt hið ólöglega myndefni og þann búnað sem notaður var til geymslu þess.
Honum var einnig gert að greiða sakarkostnað, þar með talið málsvarnarþóknun verjanda síns.
