Þrír menn hafa verið dæmdir í skilorðsbundið fangelsi fyrir aðild að því að kveikja í Tesla Model 3 bifreið í Reykjavík í ágúst árið 2023. Annar eigenda bifreiðarinnar var á þeim tíma rannsóknarlögreglumaður í fíkniefnadeild lögreglunnar á höfuðborgarsvæðinu. Bifreiðin var metin á rúmar fimm milljónir króna og eyðilagðist í eldinum.
Héraðsdómur Reykjavíkur kvað upp dóm í málinu 27. október. Mennirnir, Gabriel A. Guerrero Nunez, Luhay Leonardo Channan Nasser og Adham Abu Zer, voru ákærðir fyrir stórfelld eignaspjöll.
Rannsóknarlögreglumaðurinn taldi strax að íkveikjan gæti tengst starfi hennar. Hún hafði áður fengið hótanir vegna starfa sinna og nafngreindi einstaklinga sem hún taldi mögulega tengjast verknaðinum. Málið var því framan af meðal annars rannsakað sem mögulegt brot gegn valdstjórninni.
Ekki var hins vegar talið sannað að mennirnir þrír hefðu vitað að lögreglumaður ætti bifreiðina og voru þeir því ekki ákærðir fyrir brot gegn valdstjórninni.
Allir neituu þeir sök.
Átti að fá 100 þúsund fyrir verkið
Samkvæmt ákæru átti Luhay að fá 100 þúsund krónur fyrir verkið. Hann reyndi fyrst að kveikja í Teslunni um nóttina 17. ágúst en án árangurs. Síðar sama morgun sneri hann aftur ásamt Gabriel. Dómurinn taldi sannað að Gabriel hefði þá lagt eld að bifreiðinni en Adham hefði skipulagt og undirbúið skemmdarverkið.
Við rannsókn málsins fundust bensín og leifar af bensíni í skóm Gabriel og Luhay. Símagögn og önnur rafræn gögn voru einnig meðal sönnunargagna, þar á meðal samskipti um hvíta Teslu, mynd af bensínbrúsa og myndskeið þar sem bifreiðin sást.
Allir fengu skilorðsbundna dóma
Dómurinn taldi hafið yfir skynsamlegan vafa að mennirnir hefðu haft verkskipta aðild að brotinu. Gabriel og Luhay voru dæmdir í átta mánaða fangelsi hvor og Adham í sex mánuði. Refsingarnar eru skilorðsbundnar til þriggja ára.
