Bryndís Björg Guðmundsdóttir, fyrrverandi skólastjóri Myllubakkaskóla í Reykjanesbæ, lést á líknardeild í Kópavogi þann 25. apríl, 62 ára gömul. Mbl.is sagði frá andlátinu.
Hún fæddist í Keflavík 1. júní árið 1963 og voru foreldrar hennar Guðmundur Ármann Ingólfsson og Guðrún Guðmundsdóttir.
Bryndís lauk stúdentsprófi frá Kvennaskólanum í Reykjavík árið 1982. Síðar útskrifaðist hún með B.Ed.-gráðu frá grunnskóladeild Háskóla Íslands árið 2001, nam stjórnun og forystu í skólastarfi við Endurmenntun Háskóla Íslands árið 2006 og lauk M.Ed.-prófi í stjórnun menntastofnana árið 2021.
Á starfsferli sínum gegndi Bryndís starfi skólastjóra Myllubakkaskóla í áratug og starfaði einnig sem deildarstjóri á fræðslusviði Suðurnesjabæjar í eitt ár. Hún kenndi við Myllubakkaskóla, Holtaskóla og Heiðarskóla, var deildarstjóri í Heiðarskóla og síðar aðstoðarskólastjóri í Akurskóla.
Bryndís var þekkt fyrir öfluga stjórnunarhæfni og ríkan áhuga á menntamálum og velferð barna. Hún bjó yfir víðtækri reynslu á sviði skólamála, einkum innan grunnskóla, og lagði mikla áherslu á þróun lærdómssamfélags og aukin gæði í kennslu og skólastarfi.
Hún tók virkan þátt í félagsstarfi. Hún var landsforseti Ladies Circle á árunum 2007–2009 og félagi í Delta Kappa Gamma á Íslandi. Þá sat hún í stjórn félagsins Börnin og við, sem vinnur að málefnum brjóstagjafar, og gegndi starfi gjaldkera Íslendingafélagsins í Árósum. Einnig var hún meðlimur í Oddfellowreglunni, Rebekkustúku nr. 18 Eldey í Reykjanesbæ. Bryndís hafði jafnframt mikinn áhuga á tónlist, lærði á píanó og söng í kór.
Eiginmaður hennar, sem lifir hana, er Arnar Þór Sigurjónsson, forstöðumaður, fæddur 1961. Börn þeirra eru Íris Ósk, fædd 1987, gift Fannari Helga Rúnarssyni, og eiga þau tvö börn, Elías Snæ og Tönju Sif; Örn Brynþór, fæddur 1989; og Logi Bergþór, fæddur 1995, sem er í sambandi með Helgu Dís Halldórsdóttur. Þá tóku Bryndís og Arnar að sér fósturbarn, Stefán Jón Friðriksson.
