Halldór Laxness Halldórsson eða Dóri DNA eins og hann kallar sig, var einn af gestum Gísla Marteins síðastliðið föstudagskvöld ásamt þeim Daða Frey Péturssonar og Evu Maríu Jónsdóttur. Aðeins fjórum mínútum eftir að Dóri yfirgaf þáttinn, ældi hann í bakaríspoka sem hann fann í bílnum sínum.

Um var að ræða þátt númer 300 af Vikunni með Gísla Marteini og því var hálfgerð veisla í sjónvarpssal en þáttastjórnandinn ákvað að bjóða Dóra DNA í þáttinn í ljósi þess að hann var einnig í fyrsta þætti Gísla Marteins. Fór hann á kostum eins og venjulega og það sama má segja um Evu Maríu og Daða Frey. Þá mætti Ragnhildur Steinunn Jónsdóttir með stærðarinnar tertu í settið um miðbik þáttarins en upp úr henni, tertunni, stökk óvæntur gestur en það var enginn annar en Steindi Jr. Tók hann lagið við góðar undirtektir áhorfenda.

Ekki var að sjá á Dóra að hann væri eitthvað slappur í maganum en samkvæmt færslu frá honum á samfélagsmiðlinum X, fékk hann ælupest rétt eftir þáttinn.

„Fékk ælupest um það bil 4 mín eftir að ég yfirgaf Vikuna á fös. Fattaði á ljósum að ælan væri að koma, teygði mig þvert yfir sætin í bakaríspoka og ældi í hann,“ skrifaði Dóri og hélt áfram:

„Hélt á honum í lófanum á meðan ég stýrði bílnum á N1 við Hringbraut. Fannst erfitt að burðast með þetta leyndarmál en núna er það úti.“