Uppgjafaprófessorinn Eiríkur Rögnvaldsson segist hafa fengið nafnlaust skammarbréf í pósti sem stimplað var á Egilsstöðum.

Í Facebook-færslu sinni segir hann að slíkt gerist sem betur fer sjaldan, en hafi þó komið fyrir áður. „Ég get ekki sagt að mér hafi brugðið illilega við en mér fannst þetta þó ekkert þægilegt,“ skrifar hann.

Hann kveðst ekki taka því illa að fólk sé ósátt við sig eða skoðanir hans og segist reiðubúinn til umræðu: „Mér er alveg sama þótt fólk sé ósátt við mig og mína afstöðu í ýmsum málum og er til í að ræða hana við hverja sem er hvenær sem er.“

Eiríkur gagnrýnir þó harðlega að í bréfinu sé látnum afa hans blandað inn í málið. „Mér finnst einstaklega ósmekklegt og óviðkunnanlegt að blanda löngu látnum afa mínum í það mál,“ skrifar hann og bætir við að fullyrðingar um að metnaður afa hans hafi komið honum í prófessorsstöðu séu „fráleitar“.

„Ég minnist þess ekki að við höfum nokkurn tíma rætt starf mitt eða framtíðaráform,“ segir hann jafnframt.

Þá tekur hann skýrt fram að hann sé stoltur af nafni sínu og uppruna: „Ég er stoltur af því að heita Eiríkur og vera af Djúpadalsættinni og tel mig ekki vera henni til skammar.“

Að lokum beinir hann orðum til ónafngreinds bréfritara: „En ég vona bara að bréfritara líði betur eftir að hafa losað þennan skít úr sálinni.“