Yfir tugur manna var handtekinn í Buenos Aires eftir að óeirðir brutust út í kjölfar taps Argentínu gegn Spáni í úrslitaleik heimsmeistaramótsins í knattspyrnu í gær.
Þúsundir manna höfðu safnast saman á götum argentínsku höfuðborgarinnar í von um að sjá Lionel Messi og liðsfélaga verja heimsmeistaratitilinn. Vonbrigðin urðu hins vegar mikil þegar Spánverjar höfðu betur.
Enzo Fernández fékk rautt spjald fyrr í leiknum og Spánn nýtti sér liðsmuninn. Ferran Torres skoraði sigurmarkið í framlengingu og tryggði Spánverjum 1:0 sigur.
Leikslok urðu einnig stormasöm. Slagsmál brutust út milli leikmanna og argentínski varnarmaðurinn Leandro Paredes var rekinn af velli eftir lokaflautið fyrir að hrinda og slá til Eric Garcia úr spænska liðinu.
Í Buenos Aires, þar sem um þrjár milljónir manna búa, var stemningin lengst af friðsæl. Samkvæmt argentínska miðlinum Infobae brutust hins vegar út óeirðir um klukkan 23:45 að staðartíma þegar stuðningsmenn og lögregla tókust á.
Átökin áttu sér stað við Óbeliskann, eitt helsta kennileiti borgarinnar, eftir að hópur stuðningsmanna reyndi að komast í gegnum girðingar sem reist hafði verið til að vernda minnismerkið.
Í um 20 mínútur ríkti ringulreið þegar stór hópur kastaði glerflöskum og öðrum hlutum að lögreglu. Lögreglan svaraði með táragasi og vatnsbyssum til að dreifa mannfjöldanum.
Að minnsta kosti 15 manns voru handteknir og nokkrir slösuðust í átökunum. Ekki hefur verið greint frá ástandi þeirra sem meiddust.
Myndir frá vettvangi sýna rusl og brotin gler víða um götur Buenos Aires og á einni þeirra virðist lögreglumaður sparka í stuðningsmann sem liggur á jörðinni.
Þrátt fyrir tapið tilkynnti Javier Milei, forseti Argentínu, að efnt yrði til þjóðhátíðardags vegna árangurs landsliðsins. Hann sagði þó að leikmenn og þjálfarar myndu ákveða hvenær hátíðin færi fram. Argentínumenn fengu einnig frídag þegar landsliðið varð heimsmeistari árið 2022.
