Ökumaður hefur verið ákærður fyrir hegningar- og umferðarlagabrot vegna banaslyss sem varð við vegamót Suðurlandsvegar og Kerlingardalsvegar austan við Vík 20. júní síðastliðinn. DV greindi fyrst frá ákærunni.

Samkvæmt ákæru tók ökumaðurinn vinstri beygju inn á Kerlingardalsveg án nægilegrar aðgæslu og ók í veg fyrir bifhjól sem kom úr gagnstæðri átt. Þá er hann sagður hafa verið ófær um að stjórna bifreiðinni örugglega vegna svefnleysis.

Bifhjólið skall framan á bifreiðinni og kastaðist ökumaður þess, 55 ára maður, af hjólinu. Hann lést nær samstundis af alvarlegum áverkum.

Aðstandendur krefjast samtals rúmlega 51,4 milljóna króna í bætur vegna málsins. Málið verður tekið fyrir í Héraðsdómi Suðurlands.