Glæsilegt og afar rúmgott einbýlishús við Seljugerði 12 hefur verið sett á sölu.

Um er að ræða 334 fermetra hús á tveimur hæðum auk stórs kjallara sem ekki er skráður í Fasteignaskrá Íslands. Samkvæmt upplýsingum úr söluyfirliti er heildarstærð eignarinnar því um 510 fermetrar þegar kjallarinn er talinn með.

Húsið var byggt árið 1979 og einkennist af miklu rými og vönduðum frágangi. Á milli hæða eru glæsilegir steyptir marmaralagðir bogastigar og er lofthæð aukin á efri hæðum hússins. Þá er full lofthæð í kjallaranum, sem er gluggalaus að mestu leyti, þó mögulegt sé að bæta gluggum við hluta rýmisins.

Samkvæmt lýsingu lítur húsið ágætlega út að utan, en ráðlagt er að ráðast í viðhald á þakköntum, minni háttar steypuviðgerðir og málningu.

Lóðin er 760 fermetrar að stærð og hefur verið fullfrágengin með hellulagðri innkeyrslu með nýlegri snjóbræðslu, hellulagðri stétt fyrir framan húsið og flísalögðu yfirbyggðu anddyri. Á baklóðinni er hellulögð verönd með heitum potti auk tyrfðra flata og trjágróðurs.

Óskað er eftir tilboðum í eignina en athygli vekur að húsið var auglýst til sölu árið 2024 á 295 milljónir.