Taílensk lögregluyfirvöld hafa handtekið einn þekktasta trúarlækni landsins, Paisal Sanchai, sem sakaður er um nauðgun og kynferðisbrot gegn barni. Handtakan fór fram í Lamphun-héraði í norðurhluta Taílands fyrr í þessum mánuði, að sögn lögreglu.
Paisal, sem er 67 ára gamall, hefur um áratugaskeið notið mikilla vinsælda sem trúarlæknir og andlegur leiðtogi. Fólk úr öllum stéttum samfélagsins hefur leitað til hans í von um lækningu eða andlega ráðgjöf, enda er trú á endurholdgun, karma og yfirnáttúrulega krafta útbreidd í Taílandi.
Málið hefur vakið mikla athygli í landinu, ekki síst vegna þess að Paisal varð landsþekktur árið 2023 þegar vinsæll leikari, sem glímdi við sjálfsofnæmissjúkdóm, heimsótti hann til að leita sér aðstoðar. Leikarinn lést árið eftir.
Samkvæmt upplýsingum frá miðlægu rannsóknarlögreglunni í Bangkok hafa tveir meintir þolendur lagt fram kærur gegn Paisal. Annar þeirra var undir lögaldri þegar brotin áttu sér stað.
Lögregla segir að Paisal hafi meðal annars beðið mann um að fara úr buxunum áður en hann framdi kynferðislegt athæfi gegn honum í nafni meðferðar. Þá er hann einnig sakaður um að hafa ráðlagt ólögráða einstaklingi að stunda kynlíf með hundi sem hluta af meintri lækningaaðferð.
Á blaðamannafundi sýndi lögregla óskýrar myndir sem sagðar eru sýna Paisal við kynferðislegt athæfi sem meintur þolandi tók upp á síðasta ári.
Yfirvöld telja hugsanlegt að fleiri brotaþolar tengist málinu og hafa hvatt fólk til að stíga fram. Verði Paisal fundinn sekur gæti hann átt yfir höfði sér allt að 20 ára fangelsisdóm samkvæmt taílenskum lögum.
