Landsréttur hafnaði í febrúar kröfu lögreglu um að úrskurða starfsmann á Hraunbúðum í Vestmannaeyjum í gæsluvarðhald vegna gruns um að hann hefði gefið konu í lífslokameðferð of stóran skammt af morfíni. Þetta kemur fram í frétt RÚV.

Grunurinn byggðist einkum á framburði samstarfsmanns, sem sagðist hafa séð starfsmanninn opna lyfjadælu og bæta verulegu magni morfíns í hana. Samkvæmt úrskurðinum hafi starfsmaðurinn jafnvel sagt að hann gerði slíkt oft.

Tveir starfsmenn voru handteknir vegna málsins en rannsókn var síðar felld niður eftir að niðurstöður krufningar bárust. Landsréttur benti á að engin læknisfræðileg gögn bentu til þess að andlátið hefði borið að með grunsamlegum hætti.

Konan, sem var á tíræðisaldri, var í lífslokameðferð eftir blóðtappa og fékk morfín í gegnum lyfjadælu. Annað vitni sem annaðist hana taldi ekkert óeðlilegt hafa verið við andlátið.