Belgíski grínistinn Noël Godin, sem varð heimsþekktur fyrir að kasta rjómatertum í andlit frægra einstaklinga, er látinn, 80 ára að aldri. Sambýliskona hans, Sylvie Broodthaers, staðfesti andlátið við AFP, en Godin lést á sunnudagsmorgun.
Godin, sem lýsti sjálfum sér sem „anarkískum sælgætisgerðarmanni“, stundaði tertukast í meira en þrjá áratugi. Skotmörk hans voru einkum auðugir og áhrifamiklir einstaklingar sem hann taldi þurfa að taka sjálfa sig minna alvarlega.
Fyrsta þekkta atlaga hans var gegn franska rithöfundinum Marguerite Duras árið 1969. Síðar urðu meðal annars kvikmyndagerðarmaðurinn Jean-Luc Godard og Nicolas Sarkozy, síðar forseti Frakklands, fyrir barðinu á honum.
Godin vakti heimsathygli árið 1998 þegar honum tókst að koma tertu í andlit Bills Gates, stofnanda Microsoft. Uppátækið varð öðrum hópum víða um heim innblástur og sambærileg mótmæli fylgdu í kjölfarið.
Godin sagðist þó aldrei hafa viljað taka að sér tertuköst gegn greiðslu. Hann hafnaði meðal annars boðum um að ráðast með þessum hætti á leikkonurnar Sharon Stone og Catherine Deneuve. Hann lýsti aðferðum sínum sem „skrípalegu formi friðarstefnu“ þar sem markmiðið væri aðeins að særa stolt fórnarlambanna.
Tertukast hans hafði þó einnig lagalegar afleiðingar. Eftir að hann kastaði ananas tertu í franska forsetaframbjóðandann Jean-Pierre Chevènement árið 2002 var hann sakfelldur og sektaður.
Eftirlætisskotmark Godins var franski heimspekingurinn Bernard-Henri Lévy. Godin náði að hitta hann með tertu að minnsta kosti átta sinnum á árunum 1985 til 2015.
