Róbert Vattnes Mbah Nto og Valgeir Viðar Jakobsson hafa verið dæmdir í skilorðsbundið fangelsi fyrir sérstaklega hættulega líkamsárás sem átti sér stað í miðborg Reykjavíkur aðfaranótt 20. apríl 2024.
Samkvæmt niðurstöðu dómsins hljóp Róbert á eftir manni eftir að átök höfðu brotist út við Austurstræti. Hann hrinti manninum þannig að hann féll fram fyrir sig og lenti illa á höndum sínum. Í kjölfarið veittust Róbert og Valgeir að honum með höggum og spörkum þar sem hann lá á jörðinni. Á öryggismyndavélum sem lagðar voru fram í málinu sást meðal annars hvernig Valgeir sparkaði í höfuð mannsins eftir að hann hafði náð að setjast upp.
Brotaþolinn hlaut alvarlegt mélbrot á vinstri úlnlið sem náði inn í lið og þurfti síðar að gangast undir aðgerð þar sem sett voru skrúfur og plata í höndina. Fyrir dómi kom fram að hann hefði enn ekki náð fullum bata og líklegt væri að hann myndi búa við varanlega skerðingu á hreyfigetu úlnliðsins. Þá hefði hann verið óvinnufær um tíma vegna áverkanna.
Valgeir var einnig sakfelldur fyrir að hafa slegið annan mann í andlitið með krepptum hnefa. Við höggið féll maðurinn til jarðar, missti meðvitund og hlaut heilahristing. Dómurinn taldi sannað að afleiðingar árásarinnar hefðu verið af völdum höggsins sem Valgeir veitti.
Róbert var jafnframt sakfelldur fyrir fíkniefnalagabrot eftir að lögregla fann 2,23 grömm af kókaíni í fórum hans við handtöku. Hann játaði þann ákærulið skýlaust.
Við ákvörðun refsingar leit dómurinn meðal annars til þess að árásin hefði verið framin í félagi og beinst að manni sem lá varnarlaus á jörðinni. Þá var sérstaklega litið til þess að spark í höfuð teljist afar hættuleg aðferð sem geti valdið lífshættulegum áverkum. Til mildunar var tekið tillit til þess að nokkur dráttur hefði orðið á meðferð málsins.
Róbert Vattnes Mbah Nto var dæmdur í níu mánaða fangelsi og Valgeir Viðar Jakobsson í tólf mánaða fangelsi. Fullnustu beggja dóma var þó frestað og falla þeir niður að tveimur árum liðnum haldi mennirnir skilorð. Jafnframt voru þeir dæmdir til að greiða brotaþolanum sameiginlega 600 þúsund krónur í miskabætur auk vaxta.
