Réttarhöld yfir þýskum raðmorðingja, sem þegar afplánar lífstíðardóm fyrir morð á þremur drengjum, hófust í dag í Frakklandi. Hann er sakaður um mannrán og morð á tíu ára gömlum dreng árið 2004.
Martin Ney, sem hefur verið nefndur „maðurinn í svörtu“, er ákærður fyrir að hafa rænt og myrt Jonathan Coulom, sem hvarf úr sumarbúðum við strandbæinn Saint-Brevin-les-Pins í vesturhluta Frakklands. Jonathan var í skólaferðalagi þegar hann hvarf sporlaust úr heimavist sumarbúðanna aðfaranótt 7. apríl 2004. Samnemendur hans uppgötvuðu um morguninn að rúm hans var autt.
Lík drengsins fannst rúmum mánuði síðar í tjörn nærri bænum Guérande, um 30 kílómetrum frá staðnum þar sem hann hvarf. Lík hans hafði verið fest við steypukubb og reipi bundið um háls, hendur og fætur.
Ney, sem er 55 ára gamall, neitar sök í málinu. Hann var dæmdur í lífstíðarfangelsi í Þýskalandi árið 2012 eftir að hafa játað á sig morð á þremur drengjum á aldrinum átta til þrettán ára á árunum 1992 til 2001. Hann er sagður hafa notað grímur og lambhúshettur við árásir sínar.
Frönsk yfirvöld fengu snemma upplýsingar frá þýskum rannsakendum um að hvarf Jonathans bæri keim af öðrum barnsránum sem tengd höfðu verið við Ney. Málið tók nýja stefnu árið 2017 þegar fyrrverandi samfangi Ney sagðist hafa heyrt hann játa morð á barni í Frakklandi.
Réttarhöldin standa til 5. júní og vonast fjölskylda Jonathans til að fá loks svör um málið eftir meira en tvo áratugi.
