Sænskur tónlistarmaður með milljónir spilana á Spotify hefur verið dæmdur fyrir minniháttar fíkniefnasmygl eftir að tollverðir fundu fíkniefni falin undir pung hans á Arlanda-flugvelli í Stokkhólmi.
Maðurinn hafði nýverið komið heim frá Spáni þegar hann var stöðvaður í tollgæslu á flugvellinum í sumar. Hann hafði farið í gegnum bláa hliðið, sem er ætlað farþegum sem hafa ekkert að gefa upp við tollayfirvöld.
Við leit fundu tollverðir 30 töflur af lyfinu Pregabalin í farangri hans, en hann gat ekki framvísað lyfseðli fyrir þeim. Við yfirborðsleit á líkama hans fannst einnig plastpoki með 1,5 grömmum af kannabis falinn undir pungnum.
Við yfirheyrslu viðurkenndi listamaðurinn síðar að fíkniefnin væru hans og að hann hefði útvegað sér þau á Spáni.
Hann sagði töflurnar hafa verið keyptar í apóteki og notaðar vegna „langvinnra bakverkja“. Kannabisið hefði hann fengið frá vini sínum og notað á kvöldin.
Í yfirheyrslunni spurði rannsakandi hann:
„Gerir þú þér grein fyrir því að það er ólöglegt að flytja kannabis til Svíþjóðar?“
Listamaðurinn svaraði:
„Já, ég fann það í vasanum mínum og panikkaði, svo ég setti það undir punginn.“
Hann hefur nú verið dæmdur fyrir minniháttar fíkniefnasmygl og gert að greiða 30 dagsektir upp á 250 sænskar krónur hver, eða samtals 7.500 sænskar krónur en það gerir rétt rúmlega 98 þúsund íslenskar krónur.
