Íbúar í Masafer Yatta, samansafni smáþorpa á suðurhluta hernumda Vesturbakkans, segja ísraelskan her og landnema þrengja sífellt meira að sér, í samtali við Al Jazeera.

Í þorpinu Umm al-Khair hefur ný ólögleg landnemabyggð, sem reist var í september síðastliðnum sem framlenging á landnemabyggðinni Carmel, orðið til þess að palestínskar fjölskyldur segja sér gert nánast ómögulegt að lifa eðlilegu lífi á eigin landi.

Salem og Ikhlas al-Hathaleen búa ásamt átta börnum sínum í einföldu húsi klæddu bárujárni. Landið í kringum heimili þeirra nýttist áður til beitar og ræktunar, en nú hefur landnemabyggð verið reist aðeins um 20 metra frá húsinu.

Ikhlas segir að áður hafi morgunrútínan falist í því að gefa sauðfé fjölskyldunnar vatn og fóður, mjólka það og hleypa því á beit.

Það sé hins vegar ekki lengur mögulegt.

Að hennar sögn var fjölskyldunni fyrst meinað í fjóra daga samfleytt að komast að fjárhúsunum. Síðar hafi hún aðeins fengið að fara þangað undir fylgd ísraelskra hermanna til að gefa dýrunum mat og vatn áður en henni var aftur bannaður aðgangur. Í júlí hafi fjölskyldan aðeins þrisvar sinnum fengið að líta eftir búfé sínu.

„Ég horfi á hverjum morgni til að sjá hvort kindurnar séu enn á lífi,“ segir Ikhlas. „Ég óska þess eins að geta komist til þeirra og sinnt þeim eins og ég gerði áður.“

Erfitt að komast jafnvel á salernið

Ekki eru það aðeins fjárhúsin sem fjölskyldan á erfitt með að komast að.

Salerni heimilisins stendur í sérbyggingu nokkrum metrum frá húsinu. Ikhlas segir að landnemar hafi í byrjun júlí komið fyrir gaddavír og leikvallartækjum við salernið til að torvelda aðgang, sérstaklega fyrir börn og aldraða.

Síðar hafi ísraelski herinn lýst svæðið lokað hernaðarsvæði. Af þeim sökum hafi fjölskyldan neyðst til að nota salerni nágranna, þrátt fyrir að þurfa að fara yfir veg sem landnemar noti.

Ikhlas segir að fimm ára dóttir hennar, Swar, hafi slasast þegar hún varð fyrir bíl á þeim vegi í ágúst á síðasta ári.

„Við munum ekki yfirgefa landið okkar,“ segir hún. „Jafnvel þótt við þurfum að búa í tjaldi eða undir tré, þá verðum við hér.“

Segja landnemabyggðir stækka hratt

Íbúar Umm al-Khair segja árásum landnema hafa fjölgað verulega frá því stríðið á Gaza hófst í október 2023. Samhliða því hafi landnemabyggðir á Vesturbakkanum og í Austur-Jerúsalem haldið áfram að stækka.

Þrátt fyrir að ísraelskur dómstóll hafi fyrirskipað í október síðastliðnum að nýja landnemabyggðin yrði fjarlægð segir frétt Al Jazeera að ákvörðunin hafi síðar verið felld úr gildi eftir að herinn hafi ekki framfylgt henni.

Khalil al-Hathaleen, formaður þorpsráðs Umm al-Khair, segir að stækkun landnemabyggða hafi haft alvarleg áhrif á lífsviðurværi íbúanna.

Að hans sögn hefur sauðfé í eigu íbúa fækkað úr um 3.000 dýrum í um 700 vegna sífellt erfiðari aðstæðna. Hann segir jafnframt að meira en 1.000 ólífutré hafi verið felld, um 50 þúsund fermetrar ræktarlands teknir yfir og niðurrifsskipanir gefnar út vegna 14 húsa og annarra mannvirkja.

„Fyrir íbúa Umm al-Khair þýðir það að missa aðgang að landi sínu ekki aðeins að missa eignir,“ segir Khalil. „Það þýðir að missa heilan lífsstíl sem hefur verið við lýði kynslóð fram af kynslóð.“

Börn segja óttann orðinn hluta af daglegu lífi

Ahmed al-Hathaleen, íbúi í þorpinu, hefur safnað myndbandsupptökum og ljósmyndum sem hann segir sýna það sem íbúarnir upplifa.

Hann segir börnin verða verst úti og að sum þeirra glími við martraðir vegna ástandsins.

Tólf ára drengurinn Sahm Khalil al-Hathaleen segir að börnin hafi misst stóran hluta af æsku sinni.

„Börnin hér vilja bara lifa eins og önnur börn,“ segir hann.

Hann segist vakna skelfdur á næturnar við minnsta hljóð utan við húsið.

„Óttinn er orðinn hluti af daglegu lífi okkar.“