Sigfús Aðalsteinsson, forsvarsmaður hreyfingarinnar Ísland – þvert á flokka, boðar til samstöðufundar við Grafarvogskirkju á sunnudagsmorgun til stuðnings „listamanninum“ sem málaði yfir regnbogafána með því að mála íslensku fánalitina á kirkjutröppurnar.

Í Facebook-færslu segir Sigfús að sér og öðrum sé „ofboðið“ hvernig lögregla, kirkjan, ráðherrar og Samtökin '78 hafi brugðist við málinu.

„Held að okkur sé öllum ofboðið hvernig lögregla, kirkjan, ráðherrar og Samtökin 78 hafa ausið hatursáróðri um fánaveifumálun á kirkjutröppur í Grafarvogskirkju,“ skrifar hann og bætir við að málið sé „komið langt út fyrir alla eðlilega skynsemi.“

Sigfús segir hugmyndina vera að fjölmenna við kirkjutröppurnar og sýna „listamanninum“ stuðning.

„Allir mæta með fána og við stöndum og sitjum við þessar tröppur sem ráðamenn eru að fara á límingunum yfir og sýnum íslenska fánanum þá virðingu að hafa hann með, í hvaða formi sem er.“

Hann tekur fram að mótmælin gangi aðeins upp ef góður fjöldi fólks mæti og biður fylgjendur sína því um að láta vita hvort þeir hyggist taka þátt.

Fánamál við Grafarvogskirkju hefur vakið mikla athygli undanfarna daga og skapað harðar deilur í samfélaginu. Þar hefur meðal annars verið tekist á um hvort um hafi verið að ræða listræna tjáningu eða skemmdarverk. Forsvarsmenn Grafarvogskirkju ætla sér að mála regnbogafánann aftur á tröppurnar þegar veður leyfir.