Sigfús Aðalsteinsson fasteignasali hefur kært fyrirhugaða þjóðaratkvæðagreiðslu um framhald aðildarviðræðna Íslands við Evrópusambandið til úrskurðarnefndar kosningamála. Atkvæðagreiðslan fer fram á laugardag.

Heimildin greindi fyrst frá.

Kæran var lögð fram á föstudag og undir hana skrifa Sigfús og Þröstur Jónsson ásamt lögmanni þeirra, Loga Kjartanssyni. Þeir krefjast þess að atkvæðagreiðslan verði lýst ógild.

Í kærunni er meðal annars byggt á því að Þorgerður Katrín Gunnarsdóttir utanríkisráðherra hafi ekki haft vald eða heimildir til að boða atkvæðagreiðsluna. Málefni fullveldis og stjórnarskrár heyri samkvæmt forsetaúrskurði undir forsætisráðherra.

Þá er því haldið fram að markmið atkvæðagreiðslunnar sé óljóst, gögnum hafi verið leynt og stjórnarskrárbreyting hafi þurft að koma til áður. Jafnframt er utanríkisráðherra sakaður um áróður og Ríkisútvarpið um skort á hlutleysi.

Sigfús vakti athygli fyrir mótmæli á Austurvelli í fyrra og bauð sig fram fyrir Okkar borg í sveitarstjórnarkosningunum í vor.