Breski náttúrulífsfræðingurinn, sjónvarpsmaðurinn og grínistinn Bill Oddie er látinn, 85 ára að aldri. Umboðsmaður hans greindi frá andlátinu og minntist hans sem „ástsælasta fuglaáhugamanns Bretlands“ sem hefði skarað fram úr fyrir greind sína og húmor.
Oddie sló fyrst í gegn á áttunda áratugnum sem meðlimur grínhópsins The Goodies, ásamt Tim Brooke-Taylor og Graeme Garden. Síðar varð hann einn þekktasti náttúrulífsþáttastjórnandi Bretlands og stýrði meðal annars þáttunum Birding with Bill Oddie, Bill Oddie Goes Wild og fyrstu þáttaröðum Springwatch og Autumnwatch hjá BBC.
Í yfirlýsingu frá vini hans og umboðsmanni, David Foster, segir að Oddie hafi verið fjölhæfur listamaður, meðal annars sjónvarpsmaður, rithöfundur, tónlistarmaður og náttúruverndarsinni.
„Hann mat frægðina aldrei mikils. Þess í stað hvatti hann okkur til að bera virðingu fyrir náttúrunni og vernda hana. Framlag hans til náttúruverndar verður aldrei gleymt,“ sagði Foster.
Rekinn frá BBC
BBC rak Oddie úr Springwatch árið 2008 eftir kvörtun sem laut að hegðun hans við tökur. Nákvæmar ástæður brottrekstrarins hafa aldrei verið gerðar opinberar.
Oddie sagði síðar að hann hefði aldrei fengið skýringar á ákvörðuninni. Hann greindist með geðhvarfasýki árið 2010 og viðurkenndi að veikindin hefðu haft áhrif á hegðun sína.
Árið 2012 greindi hann frá því að brottreksturinn hefði haft alvarleg áhrif á geðheilsu hans. Hann sagðist hafa reynt að svipta sig lífi í tvö skipti og dvalið í heilt ár á sjúkrahúsi vegna alvarlegs þunglyndis.
Chris Packham tók við af honum sem þáttastjórnandi Springwatch og Autumnwatch.
Var alvarlega veikur
Oddie hélt sig að mestu frá sviðsljósinu síðustu árin. Árið 2020 greindi hann þó frá því að hann hefði verið alvarlega veikur vegna litíumeitrunar, sem hann sagði hafa verið nærri banvæna.
Bill Oddie lætur eftir sig eiginkonu sína, Lauru, og dæturnar Bonnie, Kate og Rosie.
